Akan 'a dɛsaʋn nʋ -tɩ
7
'Kaa dɩ -tea Nyɔsoa 'a -tea' a ɩmɩ -a kɛ' Israɛ -nyʋ se wɔn 'je: -Sela 'wluɛ Sadi, Sadi 'wlu Kami, -wɛe Kami 'a "ju Akan -ɔ -wlʋa 'de Suida 'a 'blʋa 'a 'blowɔn 'di mɔ -duo" dɩ -tea kpɔ "i -ɩa ma" jea i -saa 'a jrɩ' 'ʋn -wɛe Nyɔsoa 'kpa 'cɛn 'de Israɛ -nyʋ "kpei. 2 Sosue' nɩa Seriko 'sʋ ɔ dboɛ nyʋ 'de "kwi -kwlɔ ʋʋa 'daa Ai -ɛ -nɩa 'de Bɛtɩ Afɛnɩ -pʋn", 'de Betɛlɩ 'a 'jrʋ 'a 'wlʋʋ 'ɩn fɔo ɔ 'na ʋʋ "jrɛɛ. Ʋʋa' -mu' -jrɛ" Ai blʋa -nao. 3 Ʋʋ jia de 'sʋ ɛ, ʋʋ 'da ka 'de Sosue' -pee: "Sooa -wee' 'a kpaa' se -tɩ' kɔn: Nyiɔ 'ɔ "wlu 'sɔɔn (2,000) 'dewlɛ "wlu taan (3,000) 'a tʋ 'bɛɛ Ai dua' 'mɛ. -Ɩn -bo 'blʋa -wee' sea, dɛ-nʋɛ' -aa tʋ nyʋ se "i -tie.4 'Ka ɛ nʋ 'sʋ "sooa -bɛa' nyʋ 'a "wlu taan muɛ -fɔan', 'kaa ʋʋ 'kpa 'kwla 'de Ai nyʋ "juɛi 5 ʋʋa' nyʋ ʋʋ 'dba 'bɛɛ nyʋ 'a kwla taan 'jɔ -mɛɛo"- 'mɛ: Ʋʋ nʋ ʋʋpʋ i dɛ -tba' ʋʋpʋ 'a -kwlɔ paana' -ɛ -jea Sebalimʋa -wɛe ʋʋa' tʋ du ʋʋpʋ 'de crʋ -cre 'na. 'Sʋ Israɛ -nyʋ 'a pɛe cɛn mlɔʋn" -wɛe 'kpɩ wa ʋʋpʋ "i.
6 Sosue' 'fae ɛ ɔɔ' 'ʋn paadɩ i, ɔ tba "jua i 'de Nyɔsoa 'a dbɛɛdɛ 'ɛ -gbau' "juɛi -wɛe ɔ sie 'mʋa- mamaʋ 'sʋ kwie je kpʋn. 'Kamɔ Israɛ -nyʋ 'a klae" nʋ -ke. -Wɛe ʋʋ po ʋʋa' -cɛ" "pue "jru. 7 Sosue' "wɔɔ: "Aa! Tʋbo" Nyɔsoa, dɛɛtɩ- -ɩn -cɛɛn 'blʋa -nɛ Sudɛn -gbuu -bo ɛ nɩ 'kan 'de -ɩn -je -aʋn Amɔɔ -nyʋ "nyɩ -wɛe ʋʋ 'je -a -dbaa'? -Bo -a -sie 'de "ni -nɛ 'de dee ɛ "paa! 8 Kaan ka la, Tʋbo" -sie' 'blʋɔ wei 'dee, dɛ 'ɩn 'bɛɛ 'ɩn 'je 'tmʋ -mɛ Israɛ -nyʋ 'jea ple 'de ʋʋa' tʋ nyʋ "juɛi -ɛ? 9 Kanaa nyʋ ke 'blʋa 'srʋ -sia 'e mʋ a muɛ 'wɔan, ʋʋa muɛ -aʋn -pian' -wɛe ʋʋ 'je -aa 'nynɩ i -sa 'de 'blʋa -nɛ "kpei. Ka -ɩn -ma dɛ wɔn nɩa' 'a "jri "kpae po sʋn nʋ -ɛ?
10 Nyɔsoa -sɛ "kpei 'de Sosue' -pee ɛ 'na: -Ɩn -sɔn 'ʋn! Dɛɛtɩ- -ɩn -tba' "jua i 'de 'blʋɔ -ɛ? 11 Israɛ -nyʋ nʋɛ dɛsaʋn. Dbɛɛdɛ 'ɩn poa 'de ʋʋ ke 'ma 'nynɩ mɛ ʋʋ blaa wɔin. Ʋʋ "duɛ dɩ -tea kpɔi" 'ma -tɩ' 'ʋn -ɩa ma" 'jea i -saa' mɩ ʋʋ "duo 'ʋn, ʋʋ "jrii -wɛe, ʋʋ -tu" ɩ 'kwla -wɛe ʋʋ poɩ 'de ʋʋa' -cɛ" 'ɛ dɩ 'di -wɛe ʋʋ di sɩ. 12 Ɛmɛ -ɛɛ -tɩ' Israɛ -nyʋ seɛ 'bɛɛ ʋʋ 'je ʋʋa' tu nyʋ "juɛi i nyna, ʋʋa muɛ ʋʋpʋ "juɛi i plea' dɛ-nʋɛ' ʋʋ -teɛ 'de i -saa' 'a kɛ' -sɔn. 'Ɩn ke aopʋ se naa' nya kpa i -bo ao se dɛ -nɩa 'de ao "kwlu 'a ma" i -sa 'a. 13 Kaan ka la, -ɩn -sɔn -kwlu, -ɩn -kɩɩn Israɛ -nyʋ -wee' "klein "jru i, -nʋɛ' ʋʋpʋ 'je i -kwɛ. -Ɩn -da ka 'de ʋʋpʋ -pee: Ao nʋɛ ao 'je i -kwɛ -klae", dɛ-nʋɛ' dɛ Nyɔsoa -nɩa Tʋbo" Israɛ -nyʋ 'a Kea 'tmʋa ɛ ka: Israɛ -nyʋ ao 'bleɛ dɩ -tea 'ma -tea' 'de aopʋ "kwlu. Ao se 'bɛɛ ao 'je aoa' tʋ nyʋ "juɛi nyna -bo ao se dɩ -tea kpɔ "i 'de 'ma 'nynɩ 'ʋn 'de ao "kwlu 'a ma" i -sa a. Ao se 'bɛɛ ao 'je aoa' tʋ nyʋ "juɛi i nyna -bo ao se dɩ -nɩa 'mʋa- 'de ao "kwlu -sa a. 14 -Klae" pɛɛn -klae" ɛ, aoa' 'blʋa 'a 'blowɔn ɔ muɛ 'de 'ʋn "juɛi jia' due' due'. 'Blʋa 'a 'blowɔn -jɛ Nyɔsoa a mʋa tbaa' a -mɛ 'ɛ -gbɛin" 'a wɔn ɔ muɛ 'de Nyɔsoa "juɛi cɛan' -wɛe -gbɛin" 'a wɔn -jɛɛ mʋa tbaa' a -mɛ 'ɛ -gbɛin" a muɛ 'de Nyɔsoa "juɛi cɛan' -wɛe -gbɛin" -jɛɛ mʋa tbaa' a -mɛ 'ɛ "nynuʋ nmai a muɛ 'de ɛ "juɛi cɛan' due due'. 15 Nyiɔ -jɔɔ mʋa tbaa' -wɛe dɩ -tea Nyɔsoa 'a -tea' 'jea 'kwa nɩ 'jaa, -mɔ ke ɩ -wee' a muɛ "jri poa' ɔɔ' ma" je i -saa dɛ-nʋɛ' ɔ blaa Nyɔsoa 'a dbɛɛdɛ wɔn i -wɛe ɔ nʋ dɛ -sea' nʋ ka nɩ 'de Israɛ -blʋa "kpei.
16 Ɛɛ' -sɔn' dee -sɩan' 'sʋ, Sosue' 'pɛn kpaa" "kpei i -wɛe ɔɔ jaa 'e Israɛ -nyʋ 'a 'blʋa 'a 'blowɔn due' due'. -Wɛe Suida 'a 'blʋa 'a 'blowɔn -mɛ tbaa-. 17 Ɔ jaa 'e Suida 'a -gbɛin" 'a wɔn due due' -wɛe ɛ tba -Sela nyʋ 'a -gbɛin" 'a wɔn. -Wɛe ɔ jaa 'e -Sela nyʋ 'a -kwlin due due' Sadi 'a 'cɛ mʋ ɛ kpʋn. 18 Ɔ jaa 'e Sadi 'a 'cɛ 'ɛ "nynuʋ nmai due due' -wɛe ɛ kpʋn Kami 'a "ju Akan ɔ nɩɛ Sadi 'a "na ju ɛ, -ɔ -tea 'e -ɔ -nɩa -Sela 'a "na "plan, -ɔ -wlʋa 'de Suida 'a 'blʋa 'a 'blowɔn 'di ɛ.
19 Sosue' wluɛ Akan -pee ɔ 'na: 'Ma "ju, 'mɔ -ɔɔ bae -mii', -ɩn -po' Nyɔsoa Israɛ -nyʋ 'a Kea 'a dɛwɔn nɩa' 'a "jri "kpae, -ɩn -wɔɔn' dɩ -ɩn nʋa "i 'de 'ʋn -pee, -bo dɛjrɛ' i -tu" ɛ. 20 Akan -sɛ "kpei ka 'de Sosue' -pee, ɔ 'na: Tɔ' -tɩ -o, 'ɩn nʋɛ Nyɔsoa Israɛ -nyʋ 'a Kea dɛsaʋn "jri i. Dɛ 'ɩn nʋa ɛ ka: 21 'De dɩ -a -jea 'de tʋ 'ʋn "kwlu ɛ, 'ɩn 'jeɛ "bai -tɔɔn -nmɔa "i -ɛ -wlʋa Sinea' due', 'wɛi jɔ 'ɔ 'kmɛ -sɔɔn ɛ ke "sani 'a "kio 'a tɔo ke. Ɩa' 'tʋn 'kpa 'ʋn -kwli" ka -cɔɔn' ka 'sʋ 'ɩn dʋɩ 'ʋn ɛ. 'Ɩn poɛ ɩa' dɩ tu -kwlu 'de 'ma -tan 'tan 'a -kwea' -wɛe 'wɛi 'bɔɔ 'de -sɔn.
22 Sosue' dboɛ nyʋ -wi" -ʋʋ ple -ʋʋ -mu' 'de -tan 'tan -sɔn -wɛe -ʋʋ -jee' "bai -tɔɔn -poa -kwlu ke 'wɛi -nɩa 'de ɛ -sɔn "jriɛ. 23 Ʋʋ "duo ɩ -wee' 'ʋn 'ɛ -wɛe ʋʋ jɩ 'de Sosue' ke Israɛ -nyʋ "juɛi, ʋʋpʋ -tɩ' i 'de Nyɔsoa "juɛi. 24 Israɛ -nyʋ -teɛ' Sosue' kwa wɔi ʋʋ je -Sela 'a "ju Akan 'ʋn "duo ɔ ke ɔɔ' 'wɛi o, ɔɔ' "bai -tɔɔn o, ɔɔ' "sani o, ɩ ke ɔɔ' "nynuʋ nmai nynuu o, ɔɔ' 'nynɔkpae nynuu o, ɔɔ' bli' o, ɔɔ' soofae' o, ɔɔ' "nɔdɩ o, ɔɔ' -tan 'tan ke dɩ "klein -nɩa ɔɔ' -nɩ dɩ -wɛe ʋʋ kpɩ 'de Akɔɔ 'ɔ -toʋn" 'di. 25 Sosue' 'wlu 'de Akan -pee, ɔ 'na: Dɛɛ -tɩ -ɩn -ja -aʋn 'kle "kpei -ɛ? Nyɔsoa ja -ʋn dɛsaʋn "kpei -sɩan! 'Sʋ Israɛ -nyʋ nʋɛ "soi 'a 'sʋ ʋʋ je ɔ 'dba. Ʋʋ tbaa ɔɔ' nyʋ -wee' "soi i ʋʋ je ʋʋpʋ 'dba -wɛe ʋʋ po ʋʋpʋ "ku "jri. 26 'De -mɛ 'de ɛ, ʋʋ poɛ "soi -sro klaa" -ɛ -nɩa 'e mʋ -sian ke 'de ɔ "kpei. -Mɛ 'wlʋa 'de -jei" 'sʋ Nyɔsoa 'wla 'cɛn klaa" -nɛ 'mɛ. Ɛmɛ -ɛɛ -tɩ' 'ʋn nyɔ ɔ 'daa 'de 'a -ta tu Akɔɔ 'ɔ -toʋn" 'di ɛ 'de mɛ -nɩ 'kle 'je -ta, 'nynɩ -ɛ -nɩɛ "kpei ke dɛ -jɛa -sɩan 'a.